إلى الحبيب عصام حدَّاد/ د. جميل الدويهي

يـــــــــــا كبيرنا، يـا فارس الكلمه                     كيف القمَر بيودِّع الرسمِــــــــــه؟
كيف الشمس بتصير شمس غياب                     وفــــــــــوق السهل بتخيِّم العتمِه؟
كنــــــــــوزَك بيوت معلَّقه بكتاب                      ومِفتاح بيتَك رقِّـــــــــــــة النسمِه
مين قال قبرك مـن  حجر وتراب؟                     قبرَك يـا شاعر فـــوق عالنجمِه...

لا تحزني يــــــا جنينِة الإبـــــداع                     الشاعر ما سافَر، والحكي ما مات
جسمو انتقل من خيمة الأوجــــاع                     وبتضلّ روحــــــو الحبر للكلمات
هوِّي الغَني، والكون مـــــــا بيساع                    كنوز الدهــــب، وأْساوِر النغمات
وتا تكبَري أكتر يــــــا عين كفاع                      بتمثال تالت زيّني الساحـــــات...

يــــــــــا طيِّب، وقلبَك عطر نيسان                    مـــــا كنت عارف هيك رح تمشي
بالمدرسة عــــــــــم تبْرد الحيطان                     وناطر أنــــــا والريح، والدغشي...
ما عـــــــــاد يحرز نشرب الفنجان                    اسودّ الوقت، وعمارنـــــا كمشِه...
وبالرغم إنُّو الموت ظــــــــالم كان                    بتضلّ صُــــــــوره معلَّقه برمْشي.

رافض أنــــــــــا إنُّو الحنين يموت                    وتصـــــــــــــــير إنت بعالم التاني
لولا البعد مَحَّى شجــــــــر وبيوت                    إنتَ ولا مَــــــــــــــرَّه فيك تنساني
مشِّي معي تـــــا نروح عا بيروت                     وطُـــــــول الطريق نْرندِح غْناني
يللي كلامك صـــــار حبل سكوت                     سكوتَك عَ طـــــــول العمر بكَّاني.

رح ودّعَك، لكن مــــــــا فيها سنين                   ترميك خلف بـــــــــــــلاد منسيِّه...
والريح مــــــــــا بتهزُم جبل صنِّين                   ولا بتجرَح النغمِـــــــه السماويِّه...
اكتبلي شي كلمِه بين حِـــين وحين                    ابْعتلي رسالِه بجانـــــــــح الفَيِّي...
تذكَّر جميل وشربل، وكـــــل مين                    حَبَّك يا شاعر مــــــــن جبل لبنان
  وإسمَك عَ تمُّو صــــــــــــار غنِّيِّه.